Anders-umme-denken | Hans Mellendijk, de Gelderlander, edities Achterhoek, 07 -01-2016
Manges had e in Amphion motten gräölen um de krange ontdekking dat de Achterhoeker de kerstmes zol hebben uutevonden. Want wie wis doar slagmaols met de vinger de kersbeume an? “Den doar, den doar, den doar!” En wat ’n anders-umme-denken an 't ende toen Miggelbrink heel Liemers weer in 't gareel kreeg deur de Liemerse protestzanger te benumen töt Achterhoeker van het Jaar. Château.
Manges was e nao de kersmes eschrokken van de extra kilo’s dee zien prettige lichaam met mos dragen.“Dat boekspek mot minder!” belaoven e zichzelf naodat e zweitend en zwoegend deur ’t Aaltense energielandschap van stiegen en dalen, van ’t Velleker richting Balle, nao 't valse plat halverweggens bi-j de Domme Aanleg al mos opgeven. Hie had zich ok völ te warm an'ekleed op den grunen bi-jnao endejaorsdag. ’t Mos nog winter worden.
Manges anderdaags had e 'smeddags op de Haelweg bi-j Beernd Oorndigh de kwaode geesten en gedachten weg 'edreven. De luusterschelpen kabaatsend deur'esmeerd. 't Bateren as vanolds op zien arfgrond, bi-j Kaboem & Co.
Manges had 'saovends neger Herman 'm mooi tuk. Finkersiaans vernuft. De top van 't anders-umme-denken wier doar op ’t tapijt 'elegd. 'n Eigenwieze afsluuting uut 't Oosten.
Wat wier tweeduzendvieftien toch 'n on'mundeg mooi ende met 'egeven. Functioneel bloot. I-j mot d'r maor opkommen um de kwestboarheid, zachtheid moar veural schoonheid in te zetten tiggen ’t geweld en geschreeuw van 't afgelopen joar.
De welt mooier maken. 't Is zo simpel: “Waar zorgzaamheid is en liefde, daar is God. Anders gezegd: Heb elkander lief gelijk Ivo Niehe zichzelf.” Sòh 't lachen brak los. Bevri-jd wier e 't ni-je joar in 'eschotten.
's Maans lag de prenatale depressie op de loer. Manges de ontgoocheling. Naober Dopperslos heur'n 't in Köln dònderen.
Geen opmerkingen:
Een reactie posten