vrijdag 24 juli 2015

Column Hans Mellendijk | Zommerstressblues


Zommerstressblues

Manges vuult e dat midzommer ewest is. ’t Joar half veurbi-j; ‘t glas al weer half leug.
Manges emmert zien deerntjen aover ‘n emmerliest veurdat de vakantie richteg anvengt.

Manges argert e zich dood, krig e slechte zin as e op ‘n vri-jdagmeddag bi-j ’n telefoontje naor de gemeente in de wachtstand wordt ezet. ’t Feit dat e vanwege haperende gemeentediensten de verschrikkelijke muzak van Kledderkladderman anheuren mot, mek ‘m baldaodig. Bóh wisse! Póh!

Manges wier d’r in de bos van zien generatie flink ehakt. De één nao de ander völt völste vróg uut de tied. Manges steet ‘m ‘t liepen naoder dan ’t lachen. De zommerstressblues hef ‘m flink bi-j de kladden.

Manges krig e de kriebels as zien tekstverwarker de laesteikens óngevraogd umzet in fratserige ‘emoticons’. Is juust ‘t spel met de laestekens, de komma’s, puntkomma’s, de dubbele punten, streepjes,  anhalingsteikens, høk-jes, o-tjes, apensteertje, enz. niet völle mooier [ ; - )  :-(  @-/] dan die fantasieloze vertalingen in slecht vorm egeven micro-sadomachochistische-soft design? Sóh! Manges mek de hele kraom met  veurbeelden in zien computer ‘t laeven d’r neet makkelijker op. Moderne tieden, laevensmuu zo’j d’r van worden.

Manges slut e steil achteraover toen e in de krant aover ‘leefstijl’ laezen. Te hoge bloedruk zo’j d’r haost van kriegen. Was d’r nog tied van laeven dan? Manges riegt de seniorenmomenten zich an mekare. Hie zut zich alzheimerend wegzakken in de stoel. Of was t‘ slechts komkommerni-js wat e doar leazen? Bóh jao!

Manges hef e wel zien geheurapparaat terug evonden. Moar nów heurt  e elke muggenscheet. En ’t empengeneuk hölt ok moar neet op.

Manges was e nog nooit zo hard an vakantie toe ewest. Effen ‘resetten’. Zol de Zwarte Cross ‘m mangs können helpen? Dri-j dagen de kop los? Dat kump natuurlek ens zo hard terugge. Wat ’n mazzel hie hef moar ‘n kaartje’n veur énen dag.


Geen opmerkingen:

Een reactie posten