W.V.T.T.K

Koninklijke Harmonie De Eendracht | Saint-Pol-Sur-Mer | Perfidia | 
Aperitiefconcert Oostduinkerke | 21-07-2013 | Astridplein 

W.W.T.T.K.

‘t  Is der rumoereger dan andere jaoren, toen Bertus ‘t zaaltjen van De Egge binnenstaevelen. De sfeer ogen gemuudelek. Iederen zit al an de ni-jaorsborrel.

Maor schien bedrug…

Bertus blös al jaoren zien parti-jtjen met in fanfare De Eendracht en vulen juust deurumme de spanning onder de leden. Ok hie had er beheurlek de pee in. ‘Was ‘m zwaor te mude, dat dwangbevel met veurbedrukte acceptgirokaarte dee de ni-je penningmeister end december zónder aoverleg met de leden naor alle donateurs had uut doen gaon.  Dat kon toch echt neet! ’t Mot gin mottens waezen. Een verhoging van de donatie met wal honderd procent! De knieperkesactie tussen karst en old en ni-j ten behoeve van de ni-je kostuums deed eur name eer an: kniepereg bleven de hande van de luu op de knippe. D’r was een golf van protest aover de muzikanten hen ekommen. En zie telkens maor uutleggen aover teruglopende subsidies en stiegende kosten. En dat deur mot de kostuums feitelek neet millenniumbestendeg blekken te wean. Met gemengde gevulens namme plaats an één van de täöfelkes op de eerste riege. Had dat neet fatsoenleker ekund? Jao, de penningmeister was veurtvarend te werk egaon. Hie hield d’r ni-jermoe:dse methoden opnao. Allerlei activiteiten waarn der ‘t afgelopen joor ondernommen um de kas te spekken. Men kek met óntzag naor den jóngen hónd. Hie kennen de biesterbane in ’t bós van financiële anwas as gin ander. Jao, dat dei-e. Beni-jd hoo ’t bestuur zich hier uut zol redden. Hie vulen zich in elk geval belazerd. Mismu:deg was e d’r van eworden. Nie:deg was e.

De veurzitter slöt de jaorvergadering los met völ heil en zegen veur nog ’n jaor te gaon veurdat de eeuwwende zien beslag nam en gif snel ’t woord an de penningmeister. Den nemt een flinke teug van zien whisky. Met ‘n: Zo dat smek better as ’n zak met draodneagels” probeert e de stemming te ontdeujen. Hie verontschuldt zich in allerlei ingewikkelde bewoordingen veur de vergissing. Hef ’t aover tegenvallende beleggingen en miscommunicatie met de achterban, maor dat hie uutendelek toch gezwicht is veur de kritiek. Maor tja d’r mot wal wat gebeuren. Want ’t pissen geet veur ’t dansen. Anders was de baodem van de kas snel in zicht. De brief wördt terug enommen. De donatie zal qua getal de kommende jaoren hetzelfde blieven. ’t Is gewoon ’n kwestie van tied en dan zal aover twee jaor as de euro’s definitief gaot róllen, de giften vanzelf met ruum hónderd procent stiegen. In de zaal weerklunk instemmend geroezemoes: “ Wat ’n veurtschriedend inzicht”. Heur, eurluu! Lang laeve de euro. De oplossing veur ’t kastekort.

Plotseling ruk Bertus ’n zuten wraak op ’t onrecht um an edaon. Hie schrapen ziene stemme en um mónkelen te veurkommen nemt e ’n slok water. Hie wil helder blieven. “As de vergadering hiermet akkoord geet dan stel ik ik veur um ok nog ’n ándere regeling bi-j te stellen. Den van de lief en leed pot, dee is ja al sinds mensenheugenis, vief gulden de man, per kere. Terwijl ik toch meen dat wi-j bi-j zo’n brulfte of jubileum toch snel wel ’t veerdubbele de man verteert. Mi-j duch door mot bi-j dee gelegenheden ok verandering inkommen. Anders kan de vergadering met eur euro’s veur mi-j pat de pot op. Ik stel veur om dat dan maor, met dreehonderd procent te verhogen. Hoo smek ow den dan!” Bertus weurde valt instemmend op ’t tapijt. De vergadering veranderen in ’n tuutenhok. ’t Gekakel geet aover in ’n juuchend applaus. Heur um, heur um, ’t Liek ’t Britse parlement wal. ’n Hamerslag volgt, beide veurstellen bunt anenommen en de vergadering geet aover töt de orde van de dag.

Bi-j Wat Wieter Ter Taofel Kump an ekommen steet Bertus op. Hie nemt nog eenmaol ’t woord. Hie loven ’t bestuur veur de wieze beslissingen, ‘t geld en mooie weurde. Hie grip naor de binnentesse van zien colbert en toveren ’n tig of zes enveloppen teveurschien en deilen ze één veur één uut an de anwezigen. Ik make van disse gelegenheid gebruuk om owleu allemaol te neugen veur de zilveren brulfte van Mien en mi-j begin meert. De postzegels bunt op, deurumme gif ik ze dan nòw maor!