Zommerleed | Hans Mellendijk, de Gelderlander, edities Achterhoek, 21 juli 2016
Manges zag e de nerds, 't an 't beeldscharm vastgeklaevde jönkvolk,
in grote getale met vallen en opstaon naor buten basbenderen. 't Uutgestorven krimpende
darp begón weer kleur te kriegen. Manges wal oppassen dat zie al fietsend, met
't ene oog op het beeldscharm en met 't andere op de weg, ów neet van 't
perceel afjoegen. Manges zag e in zien veurroete jonge vaders 't slechte
veurbeeld geven. Manges remmen zien wagen gelukkig nog goed. Manges zag e de
veldwachters mooi op 't spöl inspöllen. Manges heuren e de Pokémonmelodieën uut
de poltiewagens klinken. Verdómd, 't nog zeer recente verleden, zien eigen jónge
olderschap kwam weer dichte bi-j. Wat geluud al neet kan bewarkstelligen.
Manges zag e nog wat older volk al 'Geocaches-catching' wal
tig of wat kilometer hardlopend de bos in. Bóh wisse de jacht zat ok de oldere
jongere, veural de jóngs, nog in 't blood. Of 't now Pokémon gaf of Geocaches, de
spöllende mens was manges nog neet uut'estorven. Dat deed zien olde hippiehart good.
Manges zakken zien bókse op de enkels toen e las aover bulten
zand dee in Warm aover 'n stroomdraod van 150kV wier elegd um dan via 'n duker
de Waalseweg aover te stekken.
Daor brak zien klomp. De ni-je leidingen, manges wal 380kV,
konden toch neet ondergronds hat e slagmaols heuren praeken. Manges was e zelf
neet vies van dat ni-je energielandschap maor um dat nów in 't kwestbaore Olde
Iesseldal te realiseren. Dat had toch ok anders ekönd. Onder Wals, Wieken en
Milt zollen dee slanke ni-je dubbele paolen 't landschap flink hebben
op'eknapt.
Manges konne e dan endelijk vandage, nao 'n laeven van äözen
en hard warken, in de wei van Drees los 'elaoten worden. Mangs mooi de Zwarte
Crossweides langs. Mangs dreumen e in Lechtenvoorde van 'n permanent pretpark op
de Engelse Schans. Dat zol pas wat geven.
Geen opmerkingen:
Een reactie posten