Zommerhettelitanie | deur Hans Mellendijk, de Gelderlander 26 juli 2014, edities Achterhoek
Manges hat e weer niks edaon. Manges was alles weer kats
vergeefs. Manges wol e opens alle weltschmerz op zien scholders nemmen. Manges zag
e de helft van de laezers afhöken umdat zie de modertaal niet meer begriept.
Umdat zie 't plat niet hebt leren laezen. Manges zag e olders met loomslaven op
de achterbanken van de wagens richting Zuud Frankriek vertrekken.
Manges eisen
e recht op aoverwarktheid! Niet allene veur stadsen, ok veur Achterhoekers. Manges was e zelf ok Alle Dagen Heel Druk. Manges sombert e dat de
Engelse zeekte niet völt te stoppen, nów zelfs Binnenlandse Zaken met de
Achterhoek communiceert middels 'n Letter
of Support. Um dudelek te maken da'w gin geld neudeg hebt umda'w nog niet
in de krimp zit maor d'r juust uut gruujt. Da'w zelfs 'n kansregio bunt!
"Jao, luustert nów 's goed doven hork; 'n kansregio!" Heuren e daor'n
Tsjakaa-goeroe zien verbale wind laoten? Ratelend as 'n valse slang? Wodden e
now uut de put 'edouwd? Of nog meer d'r in?
Manges zag e de bi-jen en de vögele des velds bi-j heupe
starven deur 't gebruuk van landbouwgif. Manges maken e zich zörge um 't publieke domein dat vergeven
wier an de commercie, um de schreeuwende borden van hofinrichters en afkaoten
op geadopteerde rotondes en ander andachtvraogersgrei. Manges dreugen 'm de
verf an de kwaste. Jao 'k zei 't al Alle Dagen Heel Druk.
Manges zag e dat de welt niet hufterbestendig was en ok
nooit zol worden. Manges zag e de onverschillegheid. Manges wier e 'snacht met
angstzweit wakker met beelden van 'n musical aover Flight MH17 in zien kop. 'n
Monsterhit met Broadwaypotenties! Met Jantje Smit en Benno Baksteen in de
hoofdrollen. Hie dreumen zich de plaatsnamen Done-tsk, Gra-Bo-Vo, To-Rez anéén
in 'n sinister Kuifje-stripverhaal. Hie zag de schurkenköppe. 't Mos niet
slimmer worden!
Manges heuren e aover antrekkende economie en zakkende
werkloosheidscijfers. En somberen e dri-j hoog in 'n schamel kantoorcomplex, op
'n verplichte cursus succesvol
solliciteren, aover zien laeftied en de kans op wark. Manges staveren e uut
't raam. Manges heuren e buten de klokken luden. Op 'n beeldscherm zöt e de
naamlozen thuuskommen.
Manges adviseren 'n kameraod 'm meer zen in zien leaven toe te laoten."Stuurt d'r ow niet
an!" "Jao, jao. Tao is 't leaven, de weg te gaon". Manges zol de
Zwarte Cross de remedie können waen tegen zien zommertiedblues. Manges kon e
wel gräölen um de uutzonderleke um-te-lachen-teksten op de borden langs de kant
van de weg. In Harreveld zag e Albert Einstein met "Ratio, Go Home!",
in Lechtenvoorde Tante Rikie in 'n pauselijk kleedjen met "Roze Cross en
Welkom in Nichtenvoorde". Manges K.W.T.W. : Kieken Wat 't Wödt.
Geen opmerkingen:
Een reactie posten